محمد عربی صلی اللہ علیہ وسلم Muhammad-e-Arabi (PBUH)

موضوع تفصیل وضاحت

رسولِ اکرمa کی حیاتِ طیبہ پر بے شمار کتابیں لکھی گئی ہیں اور لکھی جائیں گی۔ آپؐ کی ذات والا صفات اتنی جامع اور بزرگ وبرتر ہے کہ کسی ایک مصنف کے لیے یہ ممکن نہیں ہے کہ آپؐ کی حیاتِ طیبہ کے جملہ پہلوئوں کا احاطہ کر سکے۔ خود ہم نے اس موضوع پر نادر کتب (جلوۂ فاران مؤلفہ محمد عنایت اللہ سبحانی اور حیاتِ طیبہ  مؤلفہ ابو سلیم محمد عبدالحئی) شائع کی ہیں جو اپنے منفرد انداز اور افادیت کی وجہ سے ہر طبقے میں مقبول ہوئی ہیں۔ اس کے باوجود یہ خواہش ہمیشہ باقی ہی رہی کہ اس عظیم موضوع پر کچھ اور شائع کیا جائے اور اس سعادت میں جتنا بھی حصہ لیا جا سکتا ہے لیا جائے۔

الحمد للہ اب ہم محمد عربیؐ مترجمہ عنایت اللہ سبحانی صاحب…ایک ایسی کتاب شائع کر رہے ہیں جو اپنی سلاست وروانی اور اثر آفرینی میں نہایت بلند مقام رکھتی ہے۔ اس کا پہلا ایڈیشن ہندستان میں شائع ہوا، اور اب مترجم موصوف نے نظرثانی اور اضافوں کے بعد اس کو شائع کرنے کے لیے ہمیں مرحمت فرمائی۔ ہم ان کے شکر گزار ہیں کہ ہمیں اس سعادت میں حصہ لینے کا موقع فراہم کر دیا۔

کتاب جو کچھ ہے اس کا انداز ہ پڑھنے کے بعد ہو گا۔ ہم اس کو اپنے بلند معیار طباعت پر شائع کر رہے ہیں اور امید رکھتے ہیں کہ اس کو وہی قبولیت عام حاصل ہو گی جو اس کے شایانِ شان ہے۔